Blythe was She
Blythe, blythe and merry was she,
Blythe was she but and ben;
Blythe by the banks of Ern,
And blythe in Glenturit glen.
By Ochtertyre grows the aik,
On Yarrow banks the birken shaw;
But Phemie was a bonnier lass
Than braes o’ Yarrow ever saw.
Blythe, &c.
Her looks were like a flow’r in May,
Her smile was like a simmer morn:
She tripped by the banks of Ern,
As light’s a bird upon a thorn.
Blythe, &c.
Her bonnie face it was as meek
As ony lamb upon a lee;
The evening sun was ne’er sae sweet,
As was the blink o’ Phemie’s e’e.
Blythe, &c.
The Highland hills I’ve wander’d wide,
And o’er the Lowlands I hae been;
But Phemie was the blythest lass
That ever trod the dewy green.
Blythe, &c.
poem by Robert Burns
Added by Veronica Serbanoiu
Comment! | Vote! | Copy!
