The Vision Of Piers Plowman - Part 20
Thanne as I wente by the way, whan I was thus awaked,
Hevy chered I yede, and elenge in herte;
For I ne wiste wher to ete ne at what place,
And it neghed neigh the noon, and with Nede I mette,
That afrounted me foule and faitour me called.
'Coudestow noght excuse thee, as dide the kyng and othere -
That thow toke to thy bilyve, to clothes and to sustenaunce,
Was by techynge and by tellynge of Spiritus Temperancie,
And that thow nome na moore than nede thee taughte,
And nede ne hath no lawe, ne nevere shal falle in dette
For thre thynges he taketh his lif for to save? -
That is, mete whan men hym werneth, and he no moneye weldeth,
Ne wight noon wol ben his borugh, ne wed hath noon to legge;
And he ca[cch]e in that caas and come therto by sleighte,
He synneth noght, soothliche, that so wynneth his foode.
And though he come so to a clooth, and kan no bettre chevyssaunce,
Nede anoon righte nymeth hym under maynprise.
And if hym list for to lape, the lawe of kynde wolde
That he dronke at ech dych, er he [deide for thurst].
So Nede, at gret nede, may nymen as for his owene,
Withouten conseil of Conscience or Cardynale Vertues -
So that he sewe and save Spiritus Temperancie.
'For is no vertue bi fer to Spiritus Temperancie -
Neither Spiritus Iusticie ne Spiritus Fortitudinis.
For Spiritus Fortitudinis forfeteth ful ofte
He shal do moore than mesure many tyme and ofte,
And bete men over bittre, and som body to litel,
And greve men gretter than good feith it wolde.
'And Spiritus Iusticie shal juggen, wole he, nel he,
After the kynges counseil and the comune like.
And Spiritus Prudencie in many a point shal faille
Of that he weneth wolde falle if his wit ne weere.
Wenynge is no wysdom, ne wys ymaginacion
Homo proponit et Deus disponit -
[God] governeth alle goode vertues;
And Nede is next hym, for anoon he meketh
And as lowe as a lomb, for lakkyng that hym nedeth;
For nede maketh nede fele nedes lowe-herted.
Philosophres forsoke welthe for thei wolde be nedy,
And woneden wel elengely and wolde noght be riche.
'And God al his grete joye goostliche he lefte,
And cam and took mankynde and bicam nedy.'
So he was nedy, as seith the Book, in manye sondry places,
That he seide in his some on the selve roode,
''the Fox and fowel may fle to hole and crepe,
And the fissh hath fyn to flete with to reste,
Ther nede hath ynome me, that I moot nede abide
And suffre sorwes ful soure, that shal to joye torne.''
[...] Read more
poem by William Langland
Added by Poetry Lover
Comment! | Vote! | Copy!
