John Anderson My Jo
John Anderson my jo, John,
When we were first acquent,
Your locks were like the raven,
Your bonny brow was brent;
But now your brow is bled, John,
Your locks are like the straw,
But blessings on your frosty pow,
John Anderson my jo!
John Anderson my jo, John,
We clamb the hill thegither
And monie a cantie day, John,
We've had wi' ane anither;
Now we maun totter down, John,
And hand in hand we'll go,
And sleep thegither at the foot,
John Anderson my jo!
poem by Robert Burns
Added by Poetry Lover
Comment! | Vote! | Copy!
