Citatepedia^®.com

Gil Morrice. A Scottish Ballad

Gil Morrice was an erles son,
His name it waxed wide:
It was nae for his great riches,
Nor zet was mickle pride;
Bot it was for a lady gay,
That livd on Carron side.

'Quhair sall I get a bonny boy,
That will win hose and shoen;
That will gae to Lord Barnard's ha',
And bid his lady cum?
And ze maun rin my errand, Willie,
And ze may rin wi' pride;
Quhen other boys gae on their foot,
On horse-back ze sall ride.'

'O no! O no! my master dear!
I dare nae for my life;
I'll no gae to the bauld barons,
For to triest furth his wife.'
'My bird Willie, my boy Willie,
My dear Willie,' he sayd:
'How can ze strive against the stream?
For I shall be obeyd.'

'Bot, O my master dear!' he cry'd,
'In grene wod ze're zour lain;
Gi owre sic thochts, I walde ze rede,
For fear ze should be tain.'
'Haste, haste, I say, gae to the ha',
Bid hir cum here wi speid:
If ze refuse my heigh command,
Ill gar zour body bleid.

'Gae bid hir take this gay mantel,
'Tis a gowd bot the hem;
Bid hir cum to the gude grene wode,
And bring nane bot hir lain:
And there it is, a silken sarke,
Hir ain hand sewd the sleive;
And bid hir cum to Gill Morice,
Speir nae bauld barons leave.'

'Yes, I will gae zour blacke errand,
Though it be to zour cost;
Sen ze by me well nae be warn'd,
In it ze sall find frost.
The baron he is a man of might,
He neir could bide to taunt;
As ze will see before it's nicht,

[...] Read more

poem by Anonymous Olde English
Added by Poetry Lover
Comment! | Vote! | Copy!

Confessio Amantis. Explicit Liber Septimus

Incipit Liber Octavus

Que favet ad vicium vetus hec modo regula confert,
Nec novus e contra qui docet ordo placet.
Cecus amor dudum nondum sua lumina cepit,
Quo Venus impositum devia fallit iter.

------------------------------------ -----------------------------------------------
The myhti god, which unbegunne
Stant of himself and hath begunne
Alle othre thinges at his wille,
The hevene him liste to fulfille
Of alle joie, where as he
Sit inthronized in his See,
And hath hise Angles him to serve,
Suche as him liketh to preserve,
So that thei mowe noght forsueie:
Bot Lucifer he putte aweie,
With al the route apostazied
Of hem that ben to him allied,
Whiche out of hevene into the helle
From Angles into fendes felle;
Wher that ther is no joie of lyht,
Bot more derk than eny nyht
The peine schal ben endeles;
And yit of fyres natheles
Ther is plente, bot thei ben blake,
Wherof no syhte mai be take.
Thus whan the thinges ben befalle,
That Luciferes court was falle
Wher dedly Pride hem hath conveied,
Anon forthwith it was pourveied
Thurgh him which alle thinges may;
He made Adam the sexte day
In Paradis, and to his make
Him liketh Eve also to make,
And bad hem cresce and multiplie.
For of the mannes Progenie,
Which of the womman schal be bore,
The nombre of Angles which was lore,
Whan thei out fro the blisse felle,
He thoghte to restore, and felle
In hevene thilke holy place
Which stod tho voide upon his grace.
Bot as it is wel wiste and knowe,
Adam and Eve bot a throwe,
So as it scholde of hem betyde,
In Paradis at thilke tyde
Ne duelten, and the cause why,
Write in the bok of Genesi,

[...] Read more

poem by John Gower
Added by Poetry Lover
Comment! | Vote! | Copy!

Confessio Amantis. Explicit Prologus

Incipit Liber Primus

Naturatus amor nature legibus orbem
Subdit, et vnanimes concitat esse feras:
Huius enim mundi Princeps amor esse videtur,
Cuius eget diues, pauper et omnis ope.
Sunt in agone pares amor et fortuna, que cecas
Plebis ad insidias vertit vterque rotas.
Est amor egra salus, vexata quies, pius error,
Bellica pax, vulnus dulce, suaue malum.

I may noght strecche up to the hevene
Min hand, ne setten al in evene
This world, which evere is in balance:
It stant noght in my sufficance
So grete thinges to compasse,
Bot I mot lete it overpasse
And treten upon othre thinges.
Forthi the Stile of my writinges
Fro this day forth I thenke change
And speke of thing is noght so strange,
Which every kinde hath upon honde,
And wherupon the world mot stonde,
And hath don sithen it began,
And schal whil ther is any man;
And that is love, of which I mene
To trete, as after schal be sene.
In which ther can noman him reule,
For loves lawe is out of reule,
That of tomoche or of tolite
Welnyh is every man to wyte,
And natheles ther is noman
In al this world so wys, that can
Of love tempre the mesure,
Bot as it falth in aventure:
For wit ne strengthe may noght helpe,
And he which elles wolde him yelpe
Is rathest throwen under fote,
Ther can no wiht therof do bote.
For yet was nevere such covine,
That couthe ordeine a medicine
To thing which god in lawe of kinde
Hath set, for ther may noman finde
The rihte salve of such a Sor.
It hath and schal ben everemor
That love is maister wher he wile,
Ther can no lif make other skile;
For wher as evere him lest to sette,
Ther is no myht which him may lette.
Bot what schal fallen ate laste,

[...] Read more

poem by John Gower
Added by Poetry Lover
Comment! | Vote! | Copy!

Confessio Amantis. Explicit Liber Primus

Incipit Liber Secundus

Inuidie culpa magis est attrita dolore,
Nam sua mens nullo tempore leta manet:
Quo gaudent alii, dolet ille, nec vnus amicus
Est, cui de puro comoda velle facit.
Proximitatis honor sua corda veretur, et omnis
Est sibi leticia sic aliena dolor.
Hoc etenim vicium quam sepe repugnat amanti,
Non sibi, set reliquis, dum fauet ipsa Venus.
Est amor ex proprio motu fantasticus, et que
Gaudia fert alius, credit obesse sibi.

Now after Pride the secounde
Ther is, which many a woful stounde
Towardes othre berth aboute
Withinne himself and noght withoute;
For in his thoght he brenneth evere,
Whan that he wot an other levere
Or more vertuous than he,
Which passeth him in his degre;
Therof he takth his maladie:
That vice is cleped hot Envie.
Forthi, my Sone, if it be so
Thou art or hast ben on of tho,
As forto speke in loves cas,
If evere yit thin herte was
Sek of an other mannes hele?
So god avance my querele,
Mi fader, ye, a thousend sithe:
Whanne I have sen an other blithe
Of love, and hadde a goodly chiere,
Ethna, which brenneth yer be yere,
Was thanne noght so hot as I
Of thilke Sor which prively
Min hertes thoght withinne brenneth.
The Schip which on the wawes renneth,
And is forstormed and forblowe,
Is noght more peined for a throwe
Than I am thanne, whanne I se
An other which that passeth me
In that fortune of loves yifte.
Bot, fader, this I telle in schrifte,
That is nowher bot in o place;
For who that lese or finde grace
In other stede, it mai noght grieve:
Bot this ye mai riht wel believe,
Toward mi ladi that I serve,
Thogh that I wiste forto sterve,

[...] Read more

poem by John Gower
Added by Poetry Lover
Comment! | Vote! | Copy!

Confessio Amantis. Explicit Liber Tercius

Incipit Liber Quartus

Dicunt accidiam fore nutricem viciorum,
Torpet et in cunctis tarda que lenta bonis:
Que fieri possent hodie transfert piger in cras,
Furatoque prius ostia claudit equo.
Poscenti tardo negat emolumenta Cupido,
Set Venus in celeri ludit amore viri.

Upon the vices to procede
After the cause of mannes dede,
The ferste point of Slowthe I calle
Lachesce, and is the chief of alle,
And hath this propreliche of kinde,
To leven alle thing behinde.
Of that he mihte do now hier
He tarieth al the longe yer,
And everemore he seith, 'Tomorwe';
And so he wol his time borwe,
And wissheth after 'God me sende,'
That whan he weneth have an ende,
Thanne is he ferthest to beginne.
Thus bringth he many a meschief inne
Unwar, til that he be meschieved,
And may noght thanne be relieved.
And riht so nowther mor ne lesse
It stant of love and of lachesce:
Som time he slowtheth in a day
That he nevere after gete mai.
Now, Sone, as of this ilke thing,
If thou have eny knowleching,
That thou to love hast don er this,
Tell on. Mi goode fader, yis.
As of lachesce I am beknowe
That I mai stonde upon his rowe,
As I that am clad of his suite:
For whanne I thoghte mi poursuite
To make, and therto sette a day
To speke unto the swete May,
Lachesce bad abide yit,
And bar on hond it was no wit
Ne time forto speke as tho.
Thus with his tales to and fro
Mi time in tariinge he drowh:
Whan ther was time good ynowh,
He seide, 'An other time is bettre;
Thou schalt mowe senden hire a lettre,
And per cas wryte more plein
Than thou be Mowthe durstest sein.'

[...] Read more

poem by John Gower
Added by Poetry Lover
Comment! | Vote! | Copy!

Confessio Amantis. Explicit Liber Quintus

Incipit Liber Sextus

Est gula, que nostrum maculavit prima parentem
Ex vetito pomo, quo dolet omnis homo
Hec agit, ut corpus anime contraria spirat,
Quo caro fit crassa, spiritus atque macer.
Intus et exterius si que virtutis habentur,
Potibus ebrietas conviciata ruit.
Mersa sopore labis, que Bachus inebriat hospes,
Indignata Venus oscula raro premit.

---------------------------------- -------------------------------------------------

The grete Senne original,
Which every man in general
Upon his berthe hath envenymed,
In Paradis it was mystymed:
Whan Adam of thilke Appel bot,
His swete morscel was to hot,
Which dedly made the mankinde.
And in the bokes as I finde,
This vice, which so out of rule
Hath sette ous alle, is cleped Gule;
Of which the branches ben so grete,
That of hem alle I wol noght trete,
Bot only as touchende of tuo
I thenke speke and of no mo;
Wherof the ferste is Dronkeschipe,
Which berth the cuppe felaschipe.
Ful many a wonder doth this vice,
He can make of a wisman nyce,
And of a fool, that him schal seme
That he can al the lawe deme,
And yiven every juggement
Which longeth to the firmament
Bothe of the sterre and of the mone;
And thus he makth a gret clerk sone
Of him that is a lewed man.
Ther is nothing which he ne can,
Whil he hath Dronkeschipe on honde,
He knowth the See, he knowth the stronde,
He is a noble man of armes,
And yit no strengthe is in his armes:
Ther he was strong ynouh tofore,
With Dronkeschipe it is forlore,
And al is changed his astat,
And wext anon so fieble and mat,
That he mai nouther go ne come,
Bot al togedre him is benome
The pouer bothe of hond and fot,

[...] Read more

poem by John Gower
Added by Poetry Lover
Comment! | Vote! | Copy!

Confessio Amantis. Explicit Liber Secundus

Incipit Liber Tercius

Ira suis paribus est par furiis Acherontis,
Quo furor ad tempus nil pietatis habet.
Ira malencolicos animos perturbat, vt equo
Iure sui pondus nulla statera tenet.
Omnibus in causis grauat Ira, set inter amantes,
Illa magis facili sorte grauamen agit:
Est vbi vir discors leuiterque repugnat amori,
Sepe loco ludi fletus ad ora venit.

----------------------------------- ------------------------------------------------

If thou the vices lest to knowe,
Mi Sone, it hath noght ben unknowe,
Fro ferst that men the swerdes grounde,
That ther nis on upon this grounde,
A vice forein fro the lawe,
Wherof that many a good felawe
Hath be distraght be sodein chance;
And yit to kinde no plesance
It doth, bot wher he most achieveth
His pourpos, most to kinde he grieveth,
As he which out of conscience
Is enemy to pacience:
And is be name on of the Sevene,
Which ofte hath set this world unevene,
And cleped is the cruel Ire,
Whos herte is everemore on fyre
To speke amis and to do bothe,
For his servantz ben evere wrothe.
Mi goode fader, tell me this:
What thing is Ire? Sone, it is
That in oure englissh Wrathe is hote,
Which hath hise wordes ay so hote,
That all a mannes pacience
Is fyred of the violence.
For he with him hath evere fyve
Servantz that helpen him to stryve:
The ferst of hem Malencolie
Is cleped, which in compaignie
An hundred times in an houre
Wol as an angri beste loure,
And noman wot the cause why.
Mi Sone, schrif thee now forthi:
Hast thou be Malencolien?
Ye, fader, be seint Julien,
Bot I untrewe wordes use,
I mai me noght therof excuse:
And al makth love, wel I wot,

[...] Read more

poem by John Gower
Added by Poetry Lover
Comment! | Vote! | Copy!

The Brus Book IX

[The king goes to Inverurie and falls ill]

Now leve we intill the Forest
Douglas that sall bot litill rest
Till the countre deliveryt be
Off Inglis folk and thar powste,
5 And turne we till the noble king
That with the folk off his leding
Towart the Month has tane his wai
Rycht stoutly and intill gud array,
Quhar Alysander Frayser him met
10 And als his broder Symonet
With all the folk thai with thaim had.
The king gud contenance thaim made
That wes rycht blyth off thar cummyne.
Thai tauld the king off the convyne
15 Off Jhone Cumyn erle of Bouchane
That till help him had with him tane
Schyr Jhon Mowbray and other ma,
Schyr David off Brechyn alsua,
With all the folk off thar leding,
20 'And yarnys mar na ony thing
Vengeance off you, schyr king, to tak
For Schyr Jhone the Cumyn his sak
That quhylum in Drumfres wes slayn.'
The king said, 'Sa our Lord me sayn,
25 Ik had gret caus him for to sla,
And sen that thai on hand will ta
Becaus off him to werray me
I sall thole a quhile and se
On quhat wys that thai pruve thar mycht,
30 And giff it fall that thai will fycht
Giff thai assaile we sall defend,
Syne fall eftre quhat God will send.'
Eftre this spek the king in hy
Held straucht his way till Enrowry,
35 And thar him tuk sik a seknes
That put him to full hard distress.
He forbar bath drynk and mete,
His men na medicyne couth get
That ever mycht to the king availe,
40 His force gan him halyly faile
That he mycht nother rid na ga.
Then wyt ye that his men war wa,
For nane wes in that cumpany
That wald haiff bene halff sa sary
45 For till haiff sene his broder ded
Lyand befor him in that steid
As thai war for his seknes,
For all thar confort in him wes.

[...] Read more

poem by John Barbour
Added by Poetry Lover
Comment! | Vote! | Copy!

Confessio Amantis. Prologus

Torpor, ebes sensus, scola parua labor minimusque
Causant quo minimus ipse minora canam:
Qua tamen Engisti lingua canit Insula Bruti
Anglica Carmente metra iuuante loquar.
Ossibus ergo carens que conterit ossa loquelis
Absit, et interpres stet procul oro malus.

Of hem that writen ous tofore
The bokes duelle, and we therfore
Ben tawht of that was write tho:
Forthi good is that we also
In oure tyme among ous hiere
Do wryte of newe som matiere,
Essampled of these olde wyse
So that it myhte in such a wyse,
Whan we ben dede and elleswhere,
Beleve to the worldes eere
In tyme comende after this.
Bot for men sein, and soth it is,
That who that al of wisdom writ
It dulleth ofte a mannes wit
To him that schal it aldai rede,
For thilke cause, if that ye rede,
I wolde go the middel weie
And wryte a bok betwen the tweie,
Somwhat of lust, somewhat of lore,
That of the lasse or of the more
Som man mai lyke of that I wryte:
And for that fewe men endite
In oure englissh, I thenke make
A bok for Engelondes sake,
The yer sextenthe of kyng Richard.
What schal befalle hierafterward
God wot, for now upon this tyde
Men se the world on every syde
In sondry wyse so diversed,
That it welnyh stant al reversed,
As forto speke of tyme ago.
The cause whi it changeth so
It needeth nought to specifie,
The thing so open is at ije
That every man it mai beholde:
And natheles be daies olde,
Whan that the bokes weren levere,
Wrytinge was beloved evere
Of hem that weren vertuous;
For hier in erthe amonges ous,
If noman write hou that it stode,
The pris of hem that weren goode

[...] Read more

poem by John Gower
Added by Poetry Lover
Comment! | Vote! | Copy!

The Brus Book 19

[The conspiracy against King Robert; its discovery]

Than wes the land a quhile in pes,
Bot covatys, that can nocht ces
To set men apon felony
To ger thaim cum to senyoury,
5 Gert lordis off full gret renoune
Mak a fell conjuracioun
Agayn Robert the douchty king,
Thai thocht till bring him till ending
And to bruk eftre his dede
10 The kynrik and to ryng in hys steid.
The lord the Soullis, Schyr Wilyam,
Off that purches had mast defame,
For principale tharoff was he
Off assent of that cruelte.
15 He had gottyn with him sindry,
Gilbert Maleherbe, Jhone of Logy
Thir war knychtis that I tell her
And Richard Broun als a squyer,
And gud Schyr Davy off Breichyn
20 Wes off this deid arettyt syne
As I sall tell you forthermar.
Bot thai ilkane discoveryt war
Throu a lady as I hard say
Or till thar purpos cum mycht thai,
25 For scho tauld all to the king
Thar purpose and thar ordanyng,
And how that he suld haf bene ded
And Soullis ryng intill his steid,
And tauld him werray taknyng
30 This purches wes suthfast thing.
And quhen the king wist it wes sua
Sa sutell purches gan he ma
That he gert tak thaim everilkan,
And quhar the lord Soullis was tane
35 Thre hunder and sexty had he
Off squyeris cled in his lyvere
At that tyme in his cumpany
Outane knychtis that war joly.
Into Berwik takyn wes he
40 That mycht all his mengne se
Sary and wa, bot suth to say
The king lete thaim all pas thar way
And held thaim at he takyn had.

[The trial in parliament; the fate of the conspirators]

The lord Soullis sone eftre maid
45 Plane granting of all that purchas.

[...] Read more

poem by John Barbour
Added by Poetry Lover
Comment! | Vote! | Copy!

Cleanness

Clannesse who so kyndly cowþe comende
& rekken vp alle þe resounz þat ho by ri3t askez,
Fayre formez my3t he fynde in for[þ]ering his speche
& in þe contrare kark & combraunce huge.
For wonder wroth is þe Wy3þat wro3t alle þinges
Wyth þe freke þat in fylþe fol3es Hym after,
As renkez of relygioun þat reden & syngen
& aprochen to hys presens & prestez arn called;
Thay teen vnto his temmple & temen to hym seluen,
Reken with reuerence þay rychen His auter;
Þay hondel þer his aune body & vsen hit boþe.
If þay in clannes be clos þay cleche gret mede;
Bot if þay conterfete crafte & cortaysye wont,
As be honest vtwyth & inwith alle fylþez,
Þen ar þay synful hemself & sulped altogeder
Boþe God & His gere, & hym to greme cachen.
He is so clene in His courte, þe Kyng þat al weldez,
& honeste in His housholde & hagherlych serued
With angelez enourled in alle þat is clene,
Boþ withine & withouten in wedez ful bry3t;
Nif he nere scoymus & skyg & non scaþe louied,
Hit were a meruayl to much, hit mo3t not falle.
Kryst kydde hit Hymself in a carp onez,
Þeras He heuened a3t happez & hy3t hem her medez.
Me mynez on one amonge oþer, as Maþew recordez,
Þat þus clanness vnclosez a ful cler speche:
Þe haþel clene of his hert hapenez ful fayre,
For he schal loke on oure Lorde with a bone chere';
As so saytz, to þat sy3t seche schal he neuer
Þat any vnclannesse hatz on, auwhere abowte;
For He þat flemus vch fylþe fer fro His hert
May not byde þat burre þat hit His body ne3en.
Forþy hy3not to heuen in haterez totorne,
Ne in þe harlatez hod, & handez vnwaschen.
For what vrþly haþel þat hy3honour haldez
Wolde lyke if a ladde com lyþerly attyred,
When he were sette solempnely in a sete ryche,
Abof dukez on dece, with dayntys serued?
Þen þe harlot with haste helded to þe table,
With rent cokrez at þe kne & his clutte traschez,
& his tabarde totorne, & his totez oute,
Oþer ani on of alle þyse, he schulde be halden vtter,
With mony blame ful bygge, a boffet peraunter,
Hurled to þe halle dore & harde þeroute schowued,
& be forboden þat bor3e to bowe þider neuer,
On payne of enprysonment & puttyng in stokkez;
& þus schal he be schent for his schrowde feble,
Þa3neuer in talle ne in tuch he trespas more.
& if vnwelcum he were to a worþlych prynce,
3et hym is þe hy3e Kyng harder in her euen;

[...] Read more

poem by Anonymous Americas
Added by Poetry Lover
Comment! | Vote! | Copy!

The Brus Book IV

[English harshness to prisoners]

In Rawchryne leve we now the king
In rest foroutyn barganyng,
And off his fayis a quhile speke we
That throu thar mycht and thar powste
5 Maid sic a persecucioune
Sa hard, sa strayt and sa feloune
On thaim that till hym luffand wer
Or kyn or freynd on ony maner
That at till her is gret pite.
10 For thai sparyt off na degre
Thaim that thai trowit his freynd wer
Nother off the kyrk na seculer,
For off Glaskow Byschop Robert
And Marcus off Man thai stythly speryt
15 Bath in fetrys and in presoune,
And worthy Crystoll off Seytoun
Into Loudoun betresyt was
Throu a discipill off Judas
Maknab, a fals tratour that ay
20 Wes off his dwelling nycht and day
Quhom to he maid gud cumpany.
It wes fer wer than tratoury
For to betreys sic a persoune
So nobill and off sic renoune,
25 Bot tharoff had he na pite,
In hell condampnyt mocht he be.
For quhen he him betrasyt had
The Inglismen rycht with him rad
In hy in Ingland to the king,
30 That gert draw him and hede and hing
Foroutyn pete or mercy.
It wes gret sorow sekyrly
That so worthy a persoune as he
Suld on sic maner hangyt be,
35 Thusgat endyt his worthynes.
Off Crauford als Schyr Ranald wes
And Schyr Bryce als the Blar
Hangyt intill a berne in Ar.
The queyn and als Dame Marjory,
40 Hyr dochter that syne worthily
Wes coupillyt into Goddis band
With Walter Stewart off Scotland,
That wald on na wys langar ly
In the castell off Kyldromy
45 To byd a sege, ar ridin raith
With knychtis and squyeris bath
Throu Ros rycht to the gyrth off Tayne.
Bot that travaill thai maid in vayne,

[...] Read more

poem by John Barbour
Added by Poetry Lover
Comment! | Vote! | Copy!

The Brus Book XII

[The king prepares his division]

Now Douglas furth his wayis tais,
And in that selff tyme fell throw cais
That the king off Ingland quhen he
Was cummyn with his gret menye
5 Ner to the place, as I said ar,
Quhar Scottismen arayit war,
He gert arest all his bataill
And other alsua to tak consaill
Quhether thai wald herbry thaim that nycht
10 Or than but mar ga to the fycht.
The vaward that wist na thing
Off this arest na his dwelling
Raid to the Park all straucht thar way
Foroutyn stinting in gud aray,
15 And quhen the king wist that thai wer
In hale bataill cummand sa ner
His bataill gert he weill aray.
He raid apon a litill palfray
Laucht and joly arayand
20 His bataill with ane ax in hand,
And on his bassynet he bar
Ane hat off quyrbolle ay-quhar,
And thar-upon into taknyng
Ane hey croune that he wes king.

[The king kills Henry de Bohun]

25 And quhen Glosyster and Herfurd wer
With thar bataill approchand ner
Befor thaim all thar come ridand
With helm on heid and sper in hand
Schyr Henry the Boune the worthi,
30 That was a wycht knycht and a hardy
And to the erle off Herfurd cusyne,
Armyt in armys gud and fyne
Come on a sted a bow-schote ner
Befor all other that thar wer,
35 And knew the king for that he saw
Him sua rang his men on raw
And by the croune that wes set
Alsua apon his bassynet,
And towart him he went in hy.
40 And quhen the king sua apertly
Saw him cum forouth all his feris
In hy till him the hors he steris.
And quhen Schyr Henry saw the king
Cum on foroutyn abaysing
45 Till him he raid in full gret hy,

[...] Read more

poem by John Barbour
Added by Poetry Lover
Comment! | Vote! | Copy!

The Brus Book V

The king goes to Carrick; he upbraids Cuthbert]

Thys wes in ver quhen wynter tid
With his blastis hidwys to bid
Was ourdryvyn and byrdis smale
As turturis and the nychtyngale
5 Begouth rycht sariely to syng
And for to mak in thar singyng
Swete notis and sounys ser
And melodys plesand to her
And the treis begouth to ma
10 Burgeans and brycht blomys alsua
To wyn the helynd of thar hevid
That wykkyt wynter had thaim revid,
And all gressys beguth to spryng.
Into that tyme the nobill king
15 With his flote and a few mengye
Thre hunder I trow thai mycht be,
Is to the se oute off Arane
A litill forouth evyn gane.
Thai rowit fast with all thar mycht
20 Till that apon thaim fell the nycht
That woux myrk apon gret maner
Sua that thai wyst nocht quhar thai wer
For thai na nedill had na stane,
Bot rowyt alwayis intill ane
25 Sterand all tyme apon the fyr
That thai saw brynnand lycht and schyr.
It wes bot aventur thaim led
And thai in schort tyme sa thaim sped
That at the fyr aryvyt thai
30 And went to land but mair delay.
And Cuthbert that has sene the fyr
Was full of angyr and off ire,
For he durst nocht do it away
And wes alsua doutand ay
35 That his lord suld pas to se.
Tharfor thar cummyng waytit he
And met thaim at thar aryving.
He wes wele sone brocht to the kimg
That speryt at him how he had done,
40 And he with sar hart tauld him sone
How that he fand nane weill luffand
Bot all war fayis that he fand,
And that the lord the Persy
With ner thre hunder in cumpany
45 Was in the castell thar besid
Fullfillyt of dispyt and prid
Bot ma than twa partis off his rowt

[...] Read more

poem by John Barbour
Added by Poetry Lover
Comment! | Vote! | Copy!

The Brus Book X

[Preparations for battle against John of Lorn]
Quhen Thomas Randell on this wis
Wes takyn as Ik her devys
And send to dwell in gud keping
For spek that he spak to the king,
The gud king that thocht on the scaith
The dispyt and felny bath
That Jhone off Lorne had till him doyn
His ost assemblyt he then sone
And towart Lorn he tuk the way
With his men intill gud aray.
Bot Jhone off Lorn off his cummyng
Lang or he come had wittering,
And men on ilk sid gadryt he
I trow twa thousand thai mycht be
And send thaim for to stop the way
Quhar the gud king behovyt away,
And that wes in an evill plas
That sa strayt and sa narow was
That twasum samyn mycht nocht rid
In sum place off the hillis sid.
The nethyr halff was peralous
For schor crag hey and hydwous
Raucht to the se doun fra the pas,
On athyr halff the montane was
Sua combrous hey and stay
That it was hard to pas that way.
I trow nocht that in all Bretane
Ane heyar hill may fundyn be.
Thar Jhone off Lorne gert his menye
Enbuschyt be abovyn the way,
For giff the king held thar away
He thocht he suld sone vencussyt be,
And himselff held him apon the se
Weill ner the pais with his galayis.
Bot the king that in all assayis
Wes fundyn wys and avisé
Persavyt rycht weill thar sutelte,
And that he neid that gait suld ga.
His men departyt he in twa
And till the gud lord off Douglas
Quham in herbryd all worschip was
He taucht the archerys everilkane
And this gud lord with him has tane
Schyr Alysander Fraser the wycht,
And Wylyam Wysman a gud knycht
And with thaim syne Schyr Androw Gray.
Thir with thar mengne held thar way
And clamb the hill deliverly
And or thai off the tother party

[...] Read more

poem by John Barbour
Added by Poetry Lover
Comment! | Vote! | Copy!

The Brus Book I

This book the true story of King Robert and Sir James Douglas

Storys to rede ar delatibill
Suppos that thai be nocht bot fabill,
Than suld storys that suthfast wer
And thai war said on gud maner
5 Have doubill plesance in heryng.
The first plesance is the carpyng,
And the tother the suthfastnes
That schawys the thing rycht as it wes,
And suth thyngis that ar likand
10 Till mannys heryng ar plesand.
Tharfor I wald fayne set my will
Giff my wyt mycht suffice thartill
To put in wryt a suthfast story
That it lest ay furth in memory
15 Swa that na tyme of lenth it let
Na ger it haly be foryet.
For auld storys that men redys
Representis to thaim the dedys
Of stalwart folk that lyvyt ar
20 Rycht as thai than in presence war.
And certis thai suld weill have prys
That in thar tyme war wycht and wys
And led thar lyff in gret travaill,
And oft in hard stour off bataill
25 Wan gret price off chevalry
And war voydyt off cowardy,
As wes King Robert off Scotland
That hardy wes off hart and hand,
And gud Schir James off Douglas
30 That in his tyme sa worthy was
That off hys price and hys bounte
In ser landis renownyt wes he.
Off thaim I thynk this buk to ma,
Now God gyff grace that I may swa
35 Tret it and bryng till endyng
That I say nocht bot suthfast thing.

[Alexander III's death; the dispute over the succession
submitted to Edward I's arbitration]

Quhen Alexander the king wes deid
That Scotland haid to steyr and leid,
The land sex yer and mayr perfay
40 Lay desolat eftyr hys day
Till that the barnage at the last
Assemblyt thaim and fayndyt fast
To cheys a king thar land to ster

[...] Read more

poem by John Barbour
Added by Poetry Lover
Comment! | Vote! | Copy!

The Brus Book VII

[The king escapes from the hound]

The king towart the wod is gane
Wery forswayt and will of wane
Intill the wod sone entryt he
And held doun towart a vale
5 Quhar throu the woid a watter ran.
Thidder in gret hy wend he than
And begouth for to rest him thar
And said he mycht no forthirmar.
His man said, 'Schyr, it may nocht be.
10 Abyd ye her ye sall son se
Fyve hunder yarnand you to sla,
And thai ar fele aganys us twa.
And sen we may nocht dele with mycht
Help us all that we may with slycht.'
15 The king said, 'Sen that thou will sua,
Ga furth, and I sall with the ga.
Bot Ik haiff herd oftymys say
That quha endlang a watter ay
Wald waid a bow-draucht he suld ger
20 Bathe the slouth-hund and his leder
Tyne the sleuth men gert him ta.
Prove we giff it will now do sa,
For war yone devillis hund away
I roucht nocht off the lave perfay.'
25 As he dyvisyt thai haiff doyn
And entryt in the watter sone
And held down endlang thar way,
And syne to the land yeid thai
And held thar way as thai did er.
30 And Jhone off Lorn with gret affer
Come with hys rout rycht to the place
Quhar that his fyve men slane was.
He menyt thaim quhen he thaim saw
And said eftre a litill thraw
35 That he suld veng thar bloude,
Bot otherwayis the gamyn youde.
Thar wald he mak na mar dwelling
Bot furth in hy folowit the king.
Rycht to the burn thai passyt war,
40 Bot the sleuth-hund maid styntyn thar
And waveryt lang tyme to and fra
That he na certane gate couth ga,
Till at the last that Jhon of Lorn
Persavyt the hund the slouth had lorn
45 And said, 'We haiff tynt this travaill.
To pas forthyr may nocht availe
For the void is bath braid and wid

[...] Read more

poem by John Barbour
Added by Poetry Lover
Comment! | Vote! | Copy!

The Brus Book XV

The Scots win a great battle at Connor]

Quhen thai within has sene sua slayn
Thar men and chassyt hame agayn
Thai war all wa, and in gret hy
'Till armys!' hely gan thai cry.
5 Than armyt thaim all that thai war
And for the bataill maid thaim yar
Thai ischyt out all wele arayit
Into the bataill baner displayit
Bowne on thar best wis till assaile
10 Thar fayis into fell bataill.
And quhen Schyr Philip the Mowbra
Saw thaim ische in sa gud aray
Till Schyr Edward the Bruys went he
And said, 'Schyr, it is gud that we
15 Schap for sum slycht that may availe
To help us into this bataill.
Our men ar quhoyne, bot thai haf will
To do mar than thai may fulfill,
Tharfor I rede our cariage
20 Foroutyn ony man or page
Be thaimselvyn arayit be
And thai sall seyme fer ma than we,
Set we befor thaim our baneris,
Yone folk that cummys out of Coigneris
25 Quhen thai our baneris thar may se
Sall trow traistly that thar ar we
And thidder in gret hy sall thai rid.
Cum we than on thaim at a sid
And we sall be at avantag,
30 For fra thai in our cariag
Be entryt thai sall combryt be,
And than with all our mycht may we
Lay on and do all that we may.'
All as he ordanyt done haf thai,
35 And thai that come out of Coigneris
Addressyt thaim to the baneris
And smate with spuris the hors in hy
And ruschit thaim sudandly.
The barell-ferraris that war thar
40 Cumbryt thaim fast that ridand war,
And than the erle with his bataill
Come on and sadly gan assaill,
And Schyr Edward a litill by
Assemblit sua rycht hardely
45 That mony a fey fell undre fete,
The feld wox sone of blud all wete.
With sa gret felny thar thai faucht
And sic routis till other raucht

[...] Read more

poem by John Barbour
Added by Poetry Lover
Comment! | Vote! | Copy!

The Brus Book III

The lord of Lorn attacks the king's men]

The lord off Lorne wonnyt thar-by
That wes capitale ennymy
To the king for his emys sak
Jhon Comyn, and thocht for to tak
5 Vengeance apon cruell maner.
Quhen he the king wyst wes sa ner
He assemblyt his men in hy,
And had intill his cumpany
The barounys off Argyle alsua.
10 Thai war a thousand weill or ma
And come for to suppris the king
That weill wes war of thar cummyng.
Bot all to few with him he had
The-quhethir he bauldly thaim abaid,
15 And weill ost at thar fryst metyng
War layd at erd but recoveryng.
The kingis folk full weill thaim bar
And slew and fellyt and woundyt sar,
Bot the folk off the tother party
20 Faucht with axys sa fellyly,
For thai on fute war everilkane,
That thai feile off thar hors has slayne,
And till sum gaiff thai woundis wid.
James off Douglas wes hurt that tyd
25 And als Schyr Gilbert de le Hay.
The king his men saw in affray
And his ensenye can he cry
And amang thaim rycht hardyly
He rad that he thaim ruschyt all
30 And fele off thaim thar gert he fall.
Bot quhen he saw thai war sa feill
And saw thaim swa gret dyntis deill
He dred to tyne his folk, forthi
His men till him he gan rely
35 And said, 'Lordyngis, foly it war
Tyll us for till assembill mar,
For thai fele off our hors has slayn,
And giff yhe fecht with thaim agayn
We sall tyne off our small mengye
40 And our selff sall in perill be.
Tharfor me thynk maist avenand
To withdraw us us defendand
Till we cum out off thar daunger,
For our strenth at our hand is ner.'
45 Then thai withdrew thaim halely
Bot that wes nocht full cowartly
For samyn intill a sop held thai

[...] Read more

poem by John Barbour
Added by Poetry Lover
Comment! | Vote! | Copy!

The Brus Book II

[Bruce escapes to Lochmaben]

The Bruys went till his innys swyth,
Bot wyt ye weile he wes full blyth
That he had gottyn that respyt.
He callit his marschall till him tyt
5 And bad him luk on all maner
That he ma till his men gud cher,
For he wald in his chambre be
A weile gret quhile in prevate,
With him a clerk foroutyn ma.
10 The marschell till the hall gan ga
And did hys lordys commanding.
The lord the Bruce but mar letting
Gert prevely bryng stedys twa,
He and the clerk foroutyn ma
15 Lap on foroutyn persavyng,
And day and nycht but sojournyng
Thai raid quhill on the fyften day
Cummyn till Louchmaben ar thai.
Hys broder Edward thar thai fand
20 That thocht ferly Ic tak on hand
That thai come hame sa prevely.
He tauld hys brodyr halyly
How that he thar soucht was
And how that he chapyt wes throu cas.

[The killing of Comyn and his uncle]

25 Sa fell it in the samyn tid
That at Dumfres rycht thar besid
Schir Jhone the Cumyn sojornyng maid.
The Brus lap on and thidder raid
And thocht foroutyn mar letting
30 For to quyt hym his discovering.
Thidder he raid but langer let
And with Schyr Jhone the Cumyn met
In the Freris at the hye awter,
And schawyt him with lauchand cher
35 The endentur, syne with a knyff
Rycht in that sted hym reft the lyff.
Schyr Edmund Cumyn als wes slayn
And othir mony off mekill mayn.
Nocht-for-thi yeit sum men sayis
40 At that debat fell other-wayis,
Bot quhat-sa-evyr maid the debate
Thar-throuch he deyt weill I wat.
He mysdyd thar gretly but wer
That gave na gyrth to the awter,

[...] Read more

poem by John Barbour
Added by Poetry Lover
Comment! | Vote! | Copy!

The Brus Book XVIII

Only Berwick remains in English hands; a burgess offers to betray it]

The lordis off the land war fayne
Quhen thai wist he wes cummyn agan
And till him went in full gret hy,
And he ressavit thaim hamlyly
5 And maid thaim fest and glaidsum cher,
And thai sa wonderly blyth wer
Off his come that na man mycht say,
Gret fest and fayr till him maid thai.
Quharever he raid all the countre
10 Gaderyt in daynte him to se,
Gret glaidschip than wes in the land.
All than wes wonnyn till his hand,
Fra the Red Swyre to Orknay
Wes nocht off Scotland fra his fay
15 Outakyn Berwik it allane.
That tym tharin wonnyt ane
That capitane wes of the toun,
All Scottismen in suspicioun
He had and tretyt thaim tycht ill.
20 He had ay to thaim hevy will
And held thaim fast at undre ay,
Quhill that it fell apon a day
That a burges Syme of Spalding
Thocht that it wes rycht angry thing
25 Suagate ay to rebutyt be.
Tharfor intill his hart thocht he
That he wald slely mak covyne
With the marchall, quhays cosyne
He had weddyt till him wiff,
30 And as he thocht he did belyff.
Lettrys till him he send in hy
With a traist man all prively,
And set him tym to cum a nycht
With leddrys and with gud men wicht
35 Till the kow yet all prively,
And bad him hald his trist trewly
And he suld mete thaim at the wall,
For his walk thar that nycht suld fall.

[The marischal shows the letter to the king,
who seeks to avoid jealousy between Douglas and Moray]

Quhen the marchell the lettre saw
40 He umbethocht him than a thraw,
For he wist be himselvyn he
Mycht nocht off mycht no power be
For till escheyff sa gret a thing,
And giff he tuk till his helping

[...] Read more

poem by John Barbour
Added by Poetry Lover
Comment! | Vote! | Copy!